მსოფლიო ბანკმა ბიზნესის მზაობის ანგარიშის (B-READY) პირველი გამოცემა გამოაქვეყნა, რომელიც ბიზნესის წარმოების (Doing Business) ანგარიშს ანაცვლებს. მასში 50 ქვეყნის, მათ შორის საქართველოს სამეწარმეო გარემო 1200 ინდიკატორის მიხედვით არის შეფასებული.

ანგარიშის მიხედვით, საქართველო კარგი შედეგებით გამოირჩევა რეგულაციების ხარისხის, საჯარო სერვისების სიძლიერისა და სისტემის საერთო ეფექტიანობის თვალსაზრისით. მსოფლიო ბანკს ანალოგიური შეფასება აქვს ისეთი ქვეყნების მიმართ, როგორებიცაა რუანდა, კოლუმბია, ვიეტნამი და ნეპალი. როგორც მსოფლიო ბანკის ინდიკატორების ჯგუფის დირექტორმა, ნორმან ლოაიზამ განაცხადა, ეს იმის მაგალითია, რომ დაბალი და საშუალო შემოსავლის მქონე ქვეყნებს ასევე შეუძლიათ ბიზნესის ხელშემწყობი ძლიერი გარემოს შექმნა.

ანგარიშში ინდიკატორების მიხედვით ქვეყნები სამი ძირითადი მიმართულებით ფასდება: მარეგულირებელი ჩარჩო, საჯარო სერვისები და ოპერაციულ ეფექტიანობა. საქართველოს 100 შესაძლო ქულიდან 78 აქვს მარეგულირებელი ჩარჩოს ნაწილში, რითაც მე-3 ადგილს იკავებს უნგრეთის და პორტუგალიის შემდეგ. საქართველოს ოპერაციული ეფექტიანობა 85 ქულითაა შეფასებული, რაც მეორე უმაღლესი ქულაა სინგაპურის შემდეგ, ხოლო საჯარო სერვისები 63 ქულით შეფასდა, რითაც საქართველომ მე-14 ადგილი დაიკავა ქვეყნების ჩამონათვალში.