2024 წლის პირველ რვა თვეში საქართველოში მოქმედმა კაზინოებმა სახელმწიფო ბიუჯეტში 145.2 მილიონი ლარის სალიცენზიო მოსაკრებლები შეიტანეს – ამის შესახებ ბიუჯეტის შესრულების 8 თვის ანგარიშიდან ირკვევა. დოკუმენტის თანახმად, აზარტული თამაშების სექტორის მიერ გადახდილი მოსაკრებლები წინა წელთან შედარებით 20%-ით, ანუ 23.8 მილიონი ლარით არის გაზრდილი.
უფრო დეტალურად, მიღებული საბიუჯეტო შემოსავალი ასე ნაწილდება:
სათამაშო ბიზნესის მოსაკრებელი – 79,224,264 ლარი, ზრდა წინა წელთან 10%;
მოსაკრებელი სამორინეს, სათამაშო აპარატების სალონის, ტოტალიზატორის წამახალისებელი გათამაშების მოწყობის ნებართვაზე – 65,990,009 ლარი, ზრდა წინა წელთან 33.8%.
აზარტული თამაშების სექტორი სალიცენზიო გადასახადების გარდა კიდევ რამდენიმე გადასახადს იხდის, ესენია ფიზიკური პირების საშემოსავლო გადასახადი, რასაც ისინი მოგებულ თანხაზე იხდიან. 2024 წლის 1 იანვრიდან ეს მოსაკრებელი 2%-დან 5%-მდე გაიზარდა, ხოლო ონლაინ-კაზინოების მოგების გადასახადი მათი GGR-ის (მიღებულ ფსონებსა და გაცემულ მოგებას შორის სხვაობა) 15%-მდე გაიზარდა, რაც 2023 წელს 10%-ს შეადგენდა.
აღნიშნული გადასახადები დეტალიზებული სახით ბიუჯეტის ანგარიშში წარმოდგენილი არაა, შესაბამისად უცნობია რა მოცულობის მთლიანი გადასახადები შევიდა სახელმწიფო ბიუჯეტში აზარტული თამაშების სექტორიდან.
